Tuesday, December 31, 2013

ပြီးသွားမှာပါ

ဘဝမှာ...
ချစ်ခွန်းသံချို  ဆို  ခဲ့ဖူးသလို
မျက်ဝန်းစို      ငို   ခဲ့ဖူးမှာပါပဲ ...။

ဘဝမှာ...
မေတ္တာစစ်  တ  ခဲ့ရဖူးသလို
ဟန်ဆောင်ချစ်လည်း   ရ  ခဲ့ဖူးမှာပါပဲ...။

ဘဝမှာ...
အစစ်အမှန်တွေ  ရ  ခဲ့ဖူးသလို
အနှစ်မပါအကာတွေလည်း  ရ  ခဲ့ဖူးမှာပါပဲ...။

ဘဝမှာ...
အကြိမ်ကြိမ် ပြုံးပျော်ခဲ့ရဖူးသလို
အကြိမ်ကြိမ်လည်း ရှုံးအော်ခဲ့ရဖူးမှာပါပဲ...။
ဘဝမှာ...
ငြိမ်းအေးတဲ့ကာလ ရခဲ့ဖူးသလို
ခါးသီးတဲ့ခဏလည်း ကြုံ ရဖူးမှာပါပဲ...။
. . .
. . .

ဆိုးလာတိုင်းလည်း ငိုအော်မနေနဲ့ 
ကောင်းလာတိုင်းလည်း ပိုမပျော်နဲ့
 ရင်ထဲမှာ မထား

ရာသီနဲ့ ရွေ့သွားပါစေတော့
 ဘာတွေပဲ ဖြစ်ခဲ့ ဖြစ်ခဲ့ 

ဒါတွေဟာ ပြီးသွားမှာပါ...။

ရှောင်လွှဲ မရနိုင်တဲ့  အမှန်တရားတစ်ခု မှာ
ငါ...
ရာသီစက်ဝန်းနဲ့                              
          ယွန်းနေဦးမှာပါပဲ...။
ဒါလည်း ...

တစ်နေ့တော့...

ပြီးသွားမှာပါ...။
ညလေးညို 










Wednesday, January 30, 2013

လတ်တလော ရင်ထဲရောက်နေသော ကဗျာတစ်ပုဒ်

"ရေကြောင့်လောင်သောမီး"  
မြင်းမူ-မောင်နိုင်မိုး

(၁)
အချစ်ကို အကြည့်မှားလေတဲ့
 မိဖုရားစောလုံ။
သင်္ကြန်ခါ နွေတစ်ရက်မှာတဲ့
ရေပက်ခဲ့ပုံ။
ပိတောက်ခက် မထုံ့တထုံ
ကိုယ်ဝတ်ရုံ မကြော့တကြော့။
ရွှေရင်စည်း မလုံ့တလုံ
ဆံမြိတ်ငုံ မလျော့တလျော့။
မင်းဘုရင်
အတင်းပင် ကျီစယ်ချင်သမို့
သည်မယ်ခင် တစ်ကိုယ်တဲ(တည်း)ကိုဖြင့်
စိုရွဲအောင် အတာရေနဲ့
ဖြာပစေ တမင်ညွှန်း
မွန်းခဲ့ပြီပေါ့။
(၂) 
အချစ်ကို အသိမှားလေတဲ့
မိဖုရား ရွှေရင်မှာ
အမုန်းပင် လျင်စွာပျိုးလို့
မုန်းမိုးစွေရွာ။
အသည်းနာ
လွဲရှာတဲ့အမှား၊ အပေးကို အယူမတတ်လေတော့
အတွေးကို အပူဟပ်ပါလို့
ပွဲတော်စာ အဆိပ်ခတ်တယ်
သတ်မယ်တဲ့လား။
(၃) 
အချစ်နဲ့ ကျီစယ်ဆန်းပေမယ့်
အပြစ်ဖွဲ့ရည်ရွယ်ခန်းတွေကြောင့်
အလွမ်းနဲ့ ဆုံးပြီထင်...။
"သင်းအကြံ မလျော်ငြားလေသတဲ့"
မင်းမာန်ကို မကျော်လွှားနိုင်ဘု
မှားမိတဲ့ခင်။
ဖိုကျင်ထိုး သံကျပ်တင်
မီးလျှံတွင် အသေသတ်။
သံယောဇဉ်တစ်မျှင်ကြိုးကို
ငြိုးမာန်နဲ့ဖြတ်။
(၄) 
ပုဂံမြေ
လျှံဝေတဲ့အပူငွေ့။
အချစ်ကို အမြင်လွဲတော့
ရင်ထဲကြွေမြေ့ (မြည့်)။
ဥသြပျို
ပင်အိုထက် ငိုညဉ်း။
အချစ်မြေ ရေတစ်ပေါက်ကြောင့်
           တောက်ခဲ့တဲ့မီး။      ။







Sunday, August 26, 2012

လွမ်းဘဏ္ဍာ

မိုးစဲနေဟာ ဘာလို့
ငါ့ကို ဒီလောက်တောင်
လွမ်းစေရသလဲ

ရွက်ကြွေရိုးတွေဟာ ဘာလို့
ငါ့ကို ဒီလောက်တောင်
လွမ်းစေရသလဲ

တကယ်တမ်းတော့
မိုးစဲနေနဲ့လည်းမဆိုင်
ရွက်ကြွေရိုးနဲ့လည်းမဆိုင်


ငါကိုယ်တိုင်က
အလွမ်းတွေပိုင်နေခဲ့တာပါ။

ညလေးညို








Friday, August 24, 2012

လွမ်းလိပ်ပြာ

တိုးတိုးရိပ်ရိပ်
တိတ်ဆိတ်ညင်သာ
လွမ်းရိပ်လိပ်ပြာ
ပျံနေရှာဆဲ
တစ်ကောင်ထဲ...


လွမ်း၍ပျံသန်း
 ပျံသန်းရင်းလွမ်း
လေနီကြမ်းတိုး
တောင်ပံကျိုးပေါ့
အိုဘယ့် လိပ်ပြာငယ်... ...



တောင်ကျိုးနေရှာ
လိပ်ပြာငယ်မှာ
မှောင်ရိပ်နားခို
အို...
ငို နေပါပေါ့လား... 

ညလေးညို

မှတ်ချက်။ ။ တကယ်တော့ အပေါ်ဆုံးအပိုဒ်က စပ်ထားတာ ကြာလှပါပြီ။  
               ဒီနေ့ကိုယ့်နားရောက်လာတဲ့ အတောင်ကျိုးနေတဲ့လိပ်ပြာလေးကို မြင်လို့ထပ်စပ်ပြီး      
               တင်လိုက်တာပါ။ သူ့မှာ ဘယ်ဖက်အောက်အတောင်ပံကလည်း ပဲ့နေတယ်။
               ညာဖက်အတောင်ပံကလည်း ကျိုးနေရှာတယ်။








Thursday, August 23, 2012

အဇ္စျတ္တရဲ့လှိုင်းသံ

 

မျက်ဝန်းညိုပြာ ကြင်နာရိပ်စွန်း

တို့ကို ညွှန်းလေသလား...


စကားချိုသာ ကြည်သာရိပ်စွန်း

တို့ကို ညွှန်းလေသလား...


လှုပ်ရှားမူယာ တွယ်တာရိပ်စွန်း

တို့ကို ညွှန်းလေသလား


ခံစားသိမိ ကိုယ်သိ၏ဟု

ရည်စူးငြားလည်း

ဆိုင်သူရှိခြင်း

တည်ရင်းသစ္စာ

တို့မေတ္တာကို

ဘယ်လို ခွဲဝေပေးရပါ့


သြော်...

လှိုက်လှဲရင်မှာ

တောင်းကာဆုခြွေ

ကြင်နာသူနဲ့ တွေ့ပါစေ...



ညလေးညို